జగ్గయ్యపేట రూరల్‌ యువ గళం న్యూస్ :
తొలి ఏకాదశి పర్వదినం సందర్భంగా తిరుమలగిరి శ్రీ వెంకటేశ్వరస్వామి ఆలయానికి భక్తులు పోటెత్తారు. జగ్గయ్యపేట మండలం తిరుమలగిరిలో వెలసిన స్వయంభూ శ్రీ వెంకటేశ్వరస్వామిని దర్శించుకునేందుకు పరిసర ప్రాంతాల నుంచి పెద్ద సంఖ్యలో భక్తులు తరలివచ్చారు. స్వామివారు పుట్ట రూపంలో దర్శనమిచ్చే ఈ క్షేత్రాన్ని భక్తులు ఎంతో పవిత్రంగా భావిస్తారు. చిన్న తిరుపతిగా పేరొందిన ఆలయంలో పర్వదినం సందర్భంగా భక్తులకు తగిన ఏర్పాట్లు లేకపోవడంపై విమర్శలు వెల్లువెత్తాయి.

ప్రసాదాల కోసం పడిగాపులు

ఆలయానికి పెద్ద సంఖ్యలో భక్తులు వస్తారని తెలిసినప్పటికీ ప్రసాదాల విషయంలో ముందస్తు ఏర్పాట్లు చేయలేదని భక్తులు ఆరోపించారు. ఉదయం 8 గంటలకే పులిహోర ప్రసాదం అందుబాటులో లేకపోవడంతో భక్తులు తీవ్ర అసంతృప్తి వ్యక్తం చేశారు. ఉచిత ప్రసాదం కోసం వచ్చిన వారితోపాటు డబ్బులు చెల్లించి ప్రసాదం కొనుగోలు చేయాలనుకున్న వారికి కూడా పులిహోర ప్యాకెట్లు అందుబాటులో లేకపోవడంతో ఇబ్బందులు ఎదురయ్యాయని తెలిపారు.

లడ్డూలకూ కొరతే!

పులిహోరతోపాటు లడ్డూ ప్రసాదం విషయంలోనూ భక్తులకు ఇబ్బందులు ఎదురయ్యాయని ఆరోపణలు వినిపించాయి. పర్వదినం రోజున భక్తుల రద్దీని ముందుగానే అంచనా వేసి తగినన్ని లడ్డూలు, పులిహోర సిద్ధం చేయాల్సి ఉన్నా.. అందుకు అనుగుణంగా ఏర్పాట్లు చేయకపోవడంపై భక్తులు ఆగ్రహం వ్యక్తం చేశారు. ఆలయ నిర్వహణలో ముందస్తు ప్రణాళిక లోపించిందని విమర్శించారు.

సిబ్బంది తీరుపై ఆగ్రహం

ప్రసాదాల కొరతపై సిబ్బందిని ప్రశ్నించిన కొందరు భక్తులతో వారు దురుసుగా ప్రవర్తించారని పలువురు ఆరోపించారు. సమస్యను పరిష్కరించాల్సిన సిబ్బంది భక్తులతో వాగ్వాదానికి దిగడం ఏమిటని ప్రశ్నించారు. భక్తులతో మర్యాదగా వ్యవహరించాల్సిన సిబ్బంది తీరుపై ఆలయ అధికారులకు ఫిర్యాదు చేయాలని పలువురు భావించారు.

చైర్మన్ పర్యవేక్షణ ఏదీ?

ఆలయానికి అత్యంత ముఖ్యమైన పర్వదినాల్లో ఒకటైన తొలి ఏకాదశి సందర్భంగా భారీగా భక్తులు తరలివస్తారని తెలిసినా.. ప్రసాదాల కొరత ఏర్పడటంపై ఆలయ నిర్వహణ తీరును భక్తులు ప్రశ్నిస్తున్నారు. పర్వదిన ఏర్పాట్లపై చైర్మన్, ఆలయ నిర్వాహకులు ముందస్తుగా సమీక్షలు నిర్వహించారా? భక్తుల సంఖ్యకు అనుగుణంగా ప్రసాదాలను ఎందుకు సిద్ధం చేయలేదనే ప్రశ్నలు ఉత్పన్నమవుతున్నాయి. నిర్వహణ లోపాలకు బాధ్యత ఎవరిదంటూ భక్తులు నిలదీస్తున్నారు.

విచారణ జరిపి చర్యలు తీసుకోవాలి

తొలి ఏకాదశి రోజున భక్తులకు ఎదురైన అసౌకర్యాలపై ఆలయ అధికారులు సమగ్ర విచారణ చేపట్టాలని భక్తులు కోరుతున్నారు. ప్రసాదాల కొరతకు కారణాలు, ముందస్తు ఏర్పాట్లలో జరిగిన లోపాలపై బాధ్యులను గుర్తించాలని డిమాండ్ చేస్తున్నారు. భక్తులతో దురుసుగా ప్రవర్తించారన్న ఆరోపణలపై విచారణ జరిపి, నిజమని తేలితే సంబంధిత సిబ్బందిపై చర్యలు తీసుకోవాలని కోరుతున్నారు.

పవిత్రమైన ఆలయానికి వచ్చే భక్తులకు కనీస సౌకర్యాలు కల్పించడంతోపాటు, భవిష్యత్‌లో పర్వదినాల్లో ఇలాంటి పరిస్థితులు పునరావృతం కాకుండా పటిష్టమైన ఏర్పాట్లు చేయాలని భక్తులు విజ్ఞప్తి చేస్తున్నారు.